هما بی بی صولت قشقایی در گذشت
عهد باغلادیم داهی عشقدن آز دئیم
عشق آنادیر آنا یاشیل یاز دئیم
قلم، سنده قولاق دوتوب یاز دئیم
محبتلی شیرین دیللی آنادان
اؤزو قشنگ سؤزو بللی آنادان
یاز کئ دئیم من عرصیه گلمه میش
الفت رنگی صحبت ایسی بیلمه میش
غنچه گولوم هئچ بولبولا گولمه میش
سنیدینگ کی منه اورگتدینگ گولمگی
شادلیغینان محنت فرقین بیلماقی
سن ننیمه غنچه گوللر باغلادینگ
نه ذوقونان منی یاخچی ساخلادینگ
آغلایاندا غمگین اولوب آغلادینگ
اویاق چاغی بالیشت ییغیب اوتوردونگ
یاتماگ وقتی لالا دئییب یاتیردینگ
اول منه آنا دئمگ اورگتدینگ
شیرین جاندان شکر سئمگ اورگتدینگ
آرام_آرام ایچمگ_یئمگ اورگتدینگ
اوز باغچانگدا گول بئسلدن سنیدینگ
اوره گیمه عشق سسلدن سنیدینگ
چوخ گئجه لر چراغ اولدونگ یاتمادینگ
یا آی تکین شام تا سحر باتمادینگ
محبتینگ شمعین خاموش ائتمدینگ
فرق یوخویدو گون و گئجه یانینگدا
یانماگ فطرت اولموش سنینگ جانینگدا
نئچه گون دیر کی من قیشی ساییرام
تا یاز گله بیر دسته گول قاییرام
هر باغچانینگ قونچا گولون آییرام
وئرم سنه منی یاخچی گویردن
گوز یاشینی روان ائدن سوواردان
آخان سویانگ بیلمم هاردان آخمیشانگ
ایراق چولدن یا داغلاردان آخمیشانگ
یئردن جوشوب یا کی قاردان آخمیشانگ
فقط سئرم بیزیم چولدن گئدمه ینگ
یئر اوزونده روان اولانگ باتمایانگ
اوجه داغانگ باشینگا ال چاتمامیش
گونونگ چالان دمدن هلز باتمامیش
تا ایششیغنگ اویاق فرود یاتمامیش
خزان چاغی یاشیل باشینگ من گوره م
باشیم قورام دامانینگدا جان وئرم
فرود جهانگیری
دیدگاهتان را بنویسید