خوش او ملک کی بهاریندا، باغیندا
خرامان سرو-ی بستان-ی سن اولانگ
خوش اولور او باغ کی بهار چاغیندا
شبنبولی گلستان-ی سن اولانگ
بهار فصلی شام-ی مهتاب شور و حال
دلبرینن وارینگ اولا قیل و قال
خوش او شام کی سنینگ تکین ماه جمال
بیر دم ماه شبستان-ی سن اولانگ
زنجیر زولفلارینگنان اوره گ بی قرار
مجنون کیمین هجرانینگنان حالوم زار
آیریلیق دردیندن گونوم شام-ی تار
خوش او درده کی درمان-ی سن اولانگ
اوره گ ملکی تاخت و تازینگ میدان-ی
سن اولموشانگ بو میدانینگ سلطان-ی
خرامان طاووسوم گل سور دوران-ی
خوش او مُلکَه کی سلطان-ی سن اولانگ
میخانانگنا طالب اولدوم من جاما
زولفینگ ظلمتینده دوشدوم من داما
عشقینگ عرفانیندا اوغرادیم شاما
خوش او عارف کی عرفان-ی سن اولانگ
دولدور جام-ی مئیدن تا اولام خراب
سورا مزه وئر سن ، مروت ائد ثواب
جانوم ال ، اللرینگ قانوم دان خذاب
خوش او جانا کی جانان-ی سن اولانگ
نه واروم قابولینگ غیره شیرین جان
بو خنجر، بو اوره گ ، آس و کس توک قان
من بیر دلشکسته، سن گل اول مهمان
خوش حالینا کی مهمان-ی سن اولانگ
قره قاشینگ کمان،گءوزلرینگ شهباز
زولفینگ چوگان ،ساچینگ کمند ،اوزینگ ناز
یعقوب دئیر باشیم یارا پای انداز
خوش او باشا کی چوگان-ی سن اولانگ
دیدگاهتان را بنویسید
ببخشید، برای نوشتن دیدگاه باید وارد بشوید