شعر ترکی قشقایی یاغوش یاغایدی از الیاس بهرامپور ( لاچچین )

بیر اوْلایدی ، قوْوزانا قوْشولا ، آغور ائلیمیز ,
بیر اوْلایدی ، چیرپینه قیرپینه ، یاغما یئلیمیز ،
بیر اوْلایدی ، ییغیله سیلکینه ، یاغمور سئلیمیز ،
دامچا دامچا یاغوش ، بیزیم چؤله یاغایدی !

بیر اوْلایدی ، عئشق باغونا قوْنا ، زنگین ائلیمیز ،
بیر اوْلایدی ، سوْلدان اسه ساغا ، دوْلغون یئلیمیز ؛
بیر اوْلایدی ، یار داغوننا جوْشا ، جوْشغون سئلیمیز ،
چوککا چوککا یاغوش ، بیزیم گؤله یاغایدی !

بیر اوْلایدی ، آیدین اوْلا ، بیزیم توتغون یوْلوموز ،
بیر اوْلایدی ، دوْلا داشا ، بیزیم قورری گؤلۆمۆز ؛
بیر اوْلایدی ، یایغین اوْلا ، بیزیم دادلی دیلیمیز ،
آسسا آسسا یاغوش ، بیزیم گۆله یاغایدی !

بیر اوْلایدی ، نازلی ترلان ، سوْروشاندا باخاندا ،
پتگلی بال ، شیرین دیلدن دانوشاندا آخاندا ،
عیشوه له نیب غمزه له نیب ، میرریشنده یاخاندا ،
داملا داملا یاغوش ، بیزیم ائله یاغایدی !

الیاس بهرامپور ( لاچچین )

چیرپینه : بکوبد
قیرپینه : بجنبد
یاغما : سیل آسا
ییغیله : جمع شود
سیلکینه : بتکاند
یاغمور : باران
دامچا : قطره
زنگین : باشکوه ، پرجلال
سوْل : چپ / باد چپ : بادی که از جنوب غرب میوزد و بارانزا است
دوْلغون : غنی ، سرشار
جوْشغون : جوشان ، متلاطم
چوککا : قطره
گؤل : آبگیر ، دریاچه
آیدین : روشن ، درخشان
توتغون : گرفته ، تاریک
دوْلا : پرشود
داشا : سرریز شود
قورری : خشک
یایغین : شایع ، منتشر
دادلی : شیرین
آسسا : آستا ، آرام
گۆل : گل ، غنچه ی شکفته
ترلان : زیباترین پرنده ی شکاری ، نامی برای دختران
سوْروشاندا : هنگام پرسیدن
میرریشنده : موقع تبسم کردن
پتگلی : مومدار / پتگ : موم عسل
یاخاندا : هنگام سوزاندن
آخاندا : هنگام جاری شدن
داملا : قطره